હોય મારો દાખલો ને તું મથે, તાળો મળે, શક્યતા પૂરી છે ત્યાં સરવાળે ગોટાળો મળે. મધ્યમાં જે શાંત છે, કાંઠે એ ફીણાળો મળે, વાતમાં દરિયાની કોની વાતનો તાળો મળે ! પારદર્શક કાચ થઈને બહાર ક્યાં નીકળ્યાં તમે ? આ નગર છે, અહીં શુકનમાં કાંકરીચાળો મળે. આજે જે ડાળે હો જામી ભીડ ટહુકાઓની ત્યાં, શક્ય છે ત્યાં કાલે ના માળો, ના ગરમાળો મળે. રાહ નીરખે છે સદીઓની નપુંસક ફિતરતો, આ સદીને ક્યારે એનો માટી મૂંછાળો મળે ? શક્યતાઓ શ્રાપ પામી વાંઝણી હોવાનો જ્યાં, એ જ મારા ઘરમાં ઈચ્છાઓ બચરવાળો મળે. ઓઢીને સુરતીપણું ખુલ્લા ફરે છે શબ્દ સૌ, ચેતજો ! આગળ ગઝલમાં શક્ય છે, ગાળો મળે.