ધારો કે આંખ હો, કુંવારી કન્યકા તો પાંપણે ફરક્યું તે કોણ ? ધારો કે ફરક્યું તે નૈં કહું – નું નામ તો હોઠ પર મલક્યું તે કોણ ? ધારો કે મલક્યું તે અમથું ગુલાબ તો યાદ જેવું મ્હેક્યું તે કોણ ? ધારો કે મ્હેક્યું તે અષાઢી આભ તો મન મૂકી ગ્હેક્યું તે કોણ ? ધારો કે વરસ્યું તે નીંદરનું રાજ તો ઝબકીને તરસ્યું તે કોણ ? ધારો કે તરસ્યું તે પૈણ્યાનું મન તો મન મહીં થરક્યું તે કોણ ? સખી ! નજરુંમાં સરક્યું તે કોણ ? જયેન્દ્ર શેખડીવાળા