હજાર શાંતિ હો સંગ્રામ કરી જાય છે, સમય સમયનુ સદા કામ કરી જાય છે. મુસીબતો મહીં જે કામ કરી જાય છે, તમારા સમ, એ જગે નામ કરી જાય છે. કરો જો પ્રેમ કોઈથી તો વિચારી કરજો, એ નેકનામને બદનામ કરી જાય છે. નજર મિલાવી શકે કોણ ભલા રૂપ થકી, અમારું દિલ છે કે એ હામ કરી જાય છે. ભલા શું પૂંછવૂં પ્રેમી ના બલીદાન તણું, જવાની કેરું એ લીલામ કરી જાય છે. મને તો જંપવા દેતું નથી હતભાગી હ્રુદય, વ્યથા જો ભૂલથી આરામ કરી જાય છે. સિવાય ઈશ કહો એનું કરે કોણ પૂરું જે ખાલી ઘૂટ મહીં જામ કરી જાય છે. તમે નિહાળી નથી વીજ નિરાશા કેરી, એ ભસ્મીભૂત કઈં ધામ કરી જાય છે. જમાનો કાલ હશે મારા ચરણમાં "ઘાયલ", દમન છો આજ એ બેફામ કરી જાય છે.