તમે જો સાથ દેશો તો સ્વપ્ન મારું ફળી જશે, નહીં જો સાથ દેશો તો ભરમ મારો ટળી જશે. જીવનની આ સફર સીધી તમારા સાથ પૂરતી છે, તમે જાશો પછી એ કોઇ પણ રસ્તે વળી જાશે. ભલેને એના ઘરનાં બારણાં છે બંધ એથી શું ? હશે કિસ્મતમાં મળવાનું તો રસ્તામાં મળી જાશે. મને એ દુઃખ કે મારી વાત સાંભળતું નથી કોઇ, તને એ ડર કે તારી વાત કોઇ સાંભળી જાશે. કથામાં રૂપની ને પ્રેમની ખોટી જ વાતો કર, ખરી વાતો અગર કરશે તો દુનિયા ખળભળી જાશે. જરૂરત વીજની શી છે ? તણખલાંનો તો માળો છે, કોઇ એમાં તિખારો મૂકશે તો પણ બળી જાશે. રહી જશે પ્રહારો ઝીલનારા એકલો ઊભા, ને પથ્થર ફેંકનારાઓ તો ટોળામાં ભળી જાશે. સભામાં એમની ‘બેફામ’ એવી ગૂંગળામણ છે, નહીં હું નીકળું તો જીવ મારો નીકળી જાશે.